正當大傻哥如常上網搵最新一集《New Girl》打J時，發現…………
The PirateBay死Q咗！！！
追開美劇，睇開冷門cult片嘅，應該知道PirateBay係BT重鎮，再冷門嘅種子都搵得到，而且充斥各地奇片，搵reference一定要靠佢。雖然造福萬民，但亦代表傻里活（特別係唱片商）賣少好多碟，收少好多票房，命都冇。為咗確保水源，成班大佬決定向瑞典政施壓，告到班網站管理人甩褲咁濟。
訴訟長達5年，最後……5位網主被罰重款之餘，亦要坐監4個月至1年不等。上星期，網主更發出聲名，表示網站日內將會刪除所有種子檔案，以後只會列出magnet link任由用戶互相分享檔案。
 |
| Pirate Bay (2003-2012), R.I.P. |
傻里活班大哥真係好……戅居。先唔講係咪啲戲垃圾，呢個世代嘅觀眾已經習慣晒上網，唔係睇電腦檔案HD片，就係用PPTV睇streaming。仲叫人買DVD？除非好似大傻哥呢啲古老石山，先會咁做。21世紀，差唔多人人屋企有部睇得到高清影片嘅電腦，但唔係家家都有Blu－ray碟機囉。
更何況，PirateBay可以搵到平時極少見嘅非主流電影，有助大眾大開眼界，開發民智，提升欣賞能力。而家一下子cut晒，以後只可以上amazon，或求神拜佛，希望電影節生生性性……本地發行商？咩嚟㗎？
再見啦！可愛嘅PirateBay！
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
講開又講，質況每下愈況嘅「康講國際電影節」就快開波。記招由W移師到九龍富豪酒店，實行自我降格，yeah！再睇catalog，真心覺得紅十字會有排忙，因為大量影迷將嘔出數以噸計嘅鮮血，供救急輔危之用。
工作關係，大傻哥已有catalog在手，但暫時不便透露全部內容。姑且話你知兩部「重點」選片，睇睇今年搞手幾冇誠意。
先係《王者逆襲》，又名《英雄叛國記》（Coriolanus），佛地魔Ralph Fiennes自導頭炮，2011年2月柏林影展首播，之後環遊世界，4月終於到港，成為電影節highlight作品之一。（trailer見下）
另一部係《戀之罪》，2011年5月康城影展作品，園子溫執導，又係行遍全球後到港。人家最新作《庸才》早你半年開畫，HKIFF又當重點推介……（trailer見下）
呢兩部片，全部在去年台灣某某影展播放過，亦在日本、歐洲各國及美國等放映過。旅行係好事，但電影環遊世界絕對苦了觀眾，特別係少見世面嘅康講觀眾。點解講得呢兩部片？因為全部有發行商，電影節只不過做「優先場」……yeah！
咁落去，不如索性叫「康講漫遊國際電影節」啦，選片選片唔係「漫遊」世界過幾個圈，就係慢人三拍先上映……比傻里活更傻嘅，就在康講。
