#7 低成本萬歲！《Chronicle》

好多時，傻里活鍾意用錢撻人，唔理好醜，總之拍到貴一貴，你就係要睇！

始終，觀眾唔係豬西，呃得一次就冇第二次。於是市場反其道而行，主打低成本，改用素人打骰，攪出好似少少質素獨立產物，例如《Blair Witch Project》及《Paranormal Activity》等，講緊幾萬蚊（美金，下同）投資，票房高到嚇死人。

無獨有偶，以上兩片故事大略都係︰拍拍拍……我拍到啲嘢……拍拍拍……咪住！呀……救命呀，唔好殺我呀！！

同一主題下，今日有《Chronicle》（奪命異能）。導演Josh Tranks未拍過feature，三位主角亦係阿毛。成本15M美金，以今日通脹率來講，算低。

家陣啲人真係鍾意拍嘢……

套戲好短，83分鐘乜都講完。故事講出身問題家庭嘅拍片宅男（右一）無啦啦同兩個老友獲得異能，但無助宅男破處，反之俾人笑到面黃，最後short咗，佢嘅老友兼老表（左一）唯有KO佢以除社會大害。聽落……係咪似《阿基拉》呢？！直情係！係多咗拍片元素咁解。

然後，你會問︰大傻哥，套戲有乜好睇呀？

係故事設計鏡頭運用。

考慮到第一身觀點情況，覲眾通常睇唔到第一主角。梗係啦，佢要拎實部機拍嘢，唔係睇條春咩？所以，我哋只能夠「感受」佢所見嘅事物。視點好似好親切，其實好奇怪；主角慢慢行猶自可，一路跑一路chok再一路搖，分分鐘嘔到阿媽都唔認得。

不過，因為男主角識超能力，所以佢可以控制住架camera亂咁飛；換言之，機位點擺都得。一來可以由主觀視點跳至熟悉嘅第三身視點，二來架機四圍飛，感覺好犀飛利（其實咪即係吊威也！）。另外，導演用會用第三者嘅相機說故事，多咗切入點之餘，亦可以draw返條界線︰你真係睇緊戲。

初心電影人要留意，即使如吊威也呢種簡單到無倫嘅手法，只要包裝過，皆可變成神技。

唔語你知部camera四圍飛，呢張相其實好流

其他特技唔講啦，飛來飛去呢回事，你老竇睇《超人》嗰時已經有；物件四圍飛，咪即係原力囉！但你對套戲有好感，就算係屎，都係香嘅。關於咩用超能力整蠱細路，後來又走火入魔等等，基本上係21世紀超級英雄片種常見嘅命題，又係無乜特別。不過，套戲夠短，做得精，算點到即止。

阿宅男，呢個angle有啲似Peter Parker

套戲係唔錯，但不幸地，條trailer……有點流，唔講以為又係普通Sci-Fi Tragedy。唗料呀！