傻里活SorryWood: 1月 2012

2012年1月30日星期一

#4 《the Woman in Black》︰哈利波特撞鬼嚇唔大

做藝人最忌「童年陰影」，好似我哋嘅柏林仔鄚柏林，一套《柏林週記》過後成世做死柏林仔，考督察都於事無補。

荷里活嘅例子更加係多不勝數，近年最為人熟悉嘅莫過於《哈利波特》男主角丹尼爾域基夫（Daniel Radcliffe），自2001年起，哈利仔……丹尼爾至真，冇乜點高過（因為佢真係好矮），個樣差不多。

唔信？網上流傳以下一幅圖︰

此乃中文版，英文原版︰http://9gag.com/gag/2028185

嗱！幾位主角嘅髮型真係冇乜點變過咁濟！最離譜係石內卜Alan Rickman，個頭直情黐晒膠水，10年如一日！好喇，就當原著所限，形象唔改講得通。但丹尼爾做返自己，又係咩樣呢？不如比較下幾張圖︰

童年

BBC電視電影《David Copperfield》

《哈利波特》，第幾集？點Q記得！

青春期

電影《December Boys》

《哈利波特︰鳳凰會的密令》

大個仔

電影《Woman in Black》（又名︰魂遊你左右）

《哈利波特︰死神的聖物1》

咪話我大傻哥mean，睇住堆相，有一刻我真係以為係哈利仔扮返丹尼爾，特登相梳個靚髮，轉戴隱形眼鏡，然後逃學搵外快，而鄧不利多校長隻眼開隻眼閉咁囉！最慘係連劇本都出事，試想，哈利仔變魔術，大衛高拍飛又係變魔術；《December Boys》係校園故事，《哈利波特》亦離唔開霍格華茲；《Woman in Black》講「魔」鬼纏身，哈仔又何嘗唔係被佛地「魔」搞足7年咩？

實情《Woman in Black》講乜？基本上係一部英國小說，律師男主角（亦即係哈利仔）受委托出外公幹，期間個client俾咗間鬼屋佢住，入面隻冤鬼見有新客仔到，於是搞到佢不似人形，仲諗住謀埋律師個仔，陰險到呢……

呢度有條Trailer，鐘意睇就睇下啦。

算把啦！哈仔，轉型呢單嘢，你都係死咗條心把啦。倒不如叫J.K. Rowling寫本《哈利波特與金融海嘯》，講你做魔法部公務員時點樣為民拯命，用魔法變＄1,000億現金救市，分分鐘威過曾特狗；然後寫多本《哈利波特與神奇按「魔」棒》，教人點將枝魔法棒變按摩捧，天下不舉麻瓜排住隊多謝你都嚟唔切呀！

《Woman in Black》將於2012年2月10日在英國上映

2012年1月23日星期一

＃3 龍年 Is Just Not That Into You

龍年大年初二，循例恭祝各位新年快樂，萬事勝意。

每逢呢啲日子，報紙佬唔係返屋企放假，就係返公司放蚊。為充撐版面交貨走人，佢哋通常會加入唔少外國慶祝龍曆新年嘅副聞。今年唔少報導話鬼佬齊賀龍年，當正強國同胞上賓看待。Wow，強國今日強大起來，飛龍在天，日日龍咁威！仲唔企起身吶喊鼓掌？

Yeah～～～～～～

但……人家咁拍你馬屁百分百錢作怪，壓根低兒還是當你壽頭、水魚、蝗蟲，去到邊搞到邊。強國人們，醒下啦。

唔信？儘管睇下呢部《龍年》（Year Of The Dragon），1985年出品。龍年喎，應節到痺。

紐約唐人街，舞龍賀新年，非常好mood。

點知，轉個頭就打大架！新年流流見紅，認真大吉利是！

呢班中國仔都幾型下，不失炎王子孫之俊氣。

唉，原來成班都係古惑仔，又開拖啦！

噢！尊龍（John Lone）大哥！個look咁mark哥，實係正派！

發你個夢啦！Mickey Rourke個樣咁正氣，一比之下就合龍哥係反派，仲係奸到出汁那種。

正義必勝！龍哥跪地求情，掉晒強國假。

睇完trailer，明晒

冇錯，當年鬼佬眼中嘅「龍年」，同亂葬崗其實冇乜分別，而家感觀可能有少少分別，但差無幾囉。《龍年》（Year of The Dragon）基本上係黑幫片，尊龍新人上位，以為龍的傳人真係大晒，於是帶領唐人幫會喺唐人街蝦蝦霸霸，仲離譜到挑黑手幫機，作為正義化身嘅靚仔米奇哥，當然要維持正義，捉晒班死仔包坐十碌八碌啦，係咪先？

呢啲就係東方主義。即係美國佬當成個中東都係拉登，成個中國13億人都打功夫，同成個香港都係古惑仔咁解。

再講，「龍」喺傻里活入面唔係專嗒人肉刺身，就係神神化化。你能忘記《龍珠︰全新進化》有幾cult，或者係《侏羅紀公園》同《Reign of Fire》有幾生番嗎？龍年呢回事，聽下好啦，咪以為真係龍咁威啦，老友！

（P.S. 龍，有時又衰唔晒嘅，《龍紋身的少女》同《馴龍記》都幾好睇）